धरान–१५ स्थित हिबिस्कस इङलिस बोर्डिङ स्कुलको आयोजनामा हिबिस्कस क्विज मेनिया–२०८२ सिजन–४ सम्पन्न भएको छ। ग्रान्ड फिनालेमा साजिलाल माध्यमिक विद्यालय, सुन्दरहरैचा मोरङ विजेता बन्दै नगद २० हजार रुपैयाँसहित ट्रफी, मेडल र प्रमाणपत्र प्राप्त गर्न सफल भयो। प्रतियोगितामा ४५ विद्यालय सहभागी भएकामध्ये उत्कृष्ट ६ विद्यालय फाइनलमा प्रवेश गरेका थिए।
त्यसै अवसरमा स्कुलको वार्षिक उत्सव तथा पुरस्कार वितरण कार्यक्रम पनि आयोजना गरियो। कार्यक्रममा पत्रकार जनकऋषि राई, सामाजिक अभियन्ता ललित योञ्जन, ब्लड फर निडका प्रकाश गिरी र अस्थायी प्रहरी चौकी श्याम चोकलाई सम्मान गरिएको थियो। साथै, गत वर्षको वार्षिक परीक्षामा उत्कृष्ट हुने नर्सरीदेखि कक्षा–९ सम्मका विद्यार्थीहरूलाई पुरस्कार प्रदान गरियो। कार्यक्रममा प्रमुख अतिथि तथा विशिष्ट अतिथिहरूले बौद्धिक प्रतियोगिता र गुणस्तरीय शिक्षाले विद्यार्थीको सर्वाङ्गीण विकासमा योगदान पु¥याउने बताएका थिए। कार्यक्रममा विद्यार्थीहरूले विविध सांस्कृतिक प्रस्तुति समेत दिएका थिए।