पूर्वका विभिन्न जिल्लामा सवारी दुर्घटनाको श्रृंखला

धरान । पूर्वी नेपालका विभिन्न जिल्लामा पछिल्लो समयमा भएका सवारी दुर्घटनाहरूमा एक जनाको मृत्यु हुनुका साथै दर्जनौं व्यक्ति घाइते भएका छन् । प्रहरीका अनुसार दुर्घटनाहरू अधिकांश तीव्र गति, लापरवाही र सडक पार गर्ने क्रममा भएको देखिएको छ । झापा जिल्लाको कचनकवल गाउँपालिकामा सिटीसफारी र मोटरसाइकल एक आपसमा ठोक्किँदा ५० वर्षीय एक पुरुषको मृत्यु भएको छ । गम्भीर घाइते भएका उनलाई उपचारका लागि अस्पताल लैजाँदै गर्दा चिकित्सकले मृत घोषणा गरेका हुन् । त्यस्तै, मोरङ, सुनसरी, झापा, उदयपुर, धनकुटा र तेह्रथुम जिल्लामा भएका छुट्टाछुट्टै दुर्घटनाहरूमा धेरैजसो सवारी साधन अनियन्त्रित भई दुर्घटना भएका छन् । कतिपय घटनामा मोटरसाइकल र स्कुटर एकआपसमा ठोक्किएका छन् भने केही स्थानमा पैदलयात्रीलाई सवारी साधनले ठक्कर दिएको छ । मोरङ जिल्लामा मात्र भएका विभिन्न दुर्घटनामा एक दर्जनभन्दा बढी व्यक्ति घाइते भएका छन् । धिकांश घाइतेको अवस्था सामान्य रहेको प्रहरीले जनाएको छ । यस्तै, सुनसरीमा पनि मोटरसाइकल र स्कुटर दुर्घटनामा परेर केही व्यक्ति घाइते भएका छन् भने झापामा भएका विभिन्न घटनामा पनि पैदलयात्रीसहित धेरैजना घाइते भएका छन् । धनकुटा र उदयपुरमा भएका दुर्घटनाहरूमा सवारी अनियन्त्रित हुनु तथा यान्त्रिक गडबडी मुख्य कारणका रूपमा देखिएको छ भने तेह्रथुममा पिकअप गाडी सडकबाट तल खस्दा मानवीय क्षति भने नभएको प्रहरीले जनाएको छ ।
प्रहरीले सवारी चालकलाई ट्राफिक नियम पालना गर्न, तीव्र गतिमा सवारी नचलाउन र सतर्क रहन आग्रह गरेको छ । साथै, पैदलयात्रीलाई पनि सुरक्षित रूपमा सडक पार गर्न सचेत गराइएको छ ।