धरानमा सहकार्यको नयाँ सन्देशः एचआईभी संक्रमितका लागि सम्मानजनक जीवनतर्फ कदम

धरान । धरानमा एचआईभी÷ एड्सबाट प्रभावित व्यक्तिहरूको जीवनमा सकारात्मक परिवर्तन ल्याउने उद्देश्यसहित एक महत्वपूर्ण समन्वयात्मक कार्यक्रम सम्पन्न भएको छ । सामाजिक विभेद अन्त्य गर्दै उनीहरूको जीवनस्तर उकास्ने लक्ष्यका साथ आयोजित उक्त कार्यक्रमले स्थानीय तहदेखि नागरिक समाजसम्मका सरोकारवालाहरूलाई एउटै मञ्चमा ल्याएको छ । धरान पोजेटिभ समूहको आयोजना तथा उपमहानगरपालिकाको सामाजिक विकास महाशाखाको प्राविधिक सहयोगमा सम्पन्न कार्यक्रममा स्वास्थ्य संस्था, स्थानीय सरकार, अभियन्ता तथा एचआईभी संक्रमितहरूसँग प्रत्यक्ष रूपमा काम गरिरहेका व्यक्तिहरूको सक्रिय सहभागिता थियो । कार्यक्रममा सहभागीहरूले संक्रमितहरूले अझै पनि समाजमा भोग्नुपरेको विभेद, स्वास्थ्य सेवामा सहज पहुँचको अभाव तथा जनचेतनाको कमी जस्ता चुनौतीहरूबारे खुलेर धारणा राखे । कार्यक्रमले एउटा महत्वपूर्ण सन्देश दिएको छ–एचआईभी संक्रमितहरूलाई केवल स्वास्थ्य उपचार मात्र होइन, सामाजिक स्वीकार्यता, सुरक्षा र अवसरको आवश्यकता पनि उत्तिकै महत्वपूर्ण छ । सहभागीहरूले विभेदरहित समाज निर्माणका लागि सामूहिक प्रयास अपरिहार्य रहेकोमा जोड दिए । धरान पोजेटिभ समूहकी प्रतिनिधि सुमि विश्वकर्माले सरोकारवालाबीचको सहकार्यलाई अभियानको प्रमुख उपलब्धिका रूपमा चित्रित गर्दै यस्ता कार्यक्रमहरूले स्पष्ट कार्यदिशा तय गर्न मद्दत गर्ने बताउनुभयो । ‘सहकार्य र समन्वयबिना लक्ष्य हासिल गर्न सकिँदैन,’ उहाँले भन्नुभयो, ‘यो कार्यक्रमले आगामी कदमहरूलाई स्पष्ट मार्गदर्शन गरेको छ ।’

उक्त अवसरमा धरान उपमहानगरपालिकाका कार्यवाहक मेयर अइन्द्र विक्रम बेघाले स्थानीय सरकार एचआईभी संक्रमितहरूको समग्र जीवनसँग गम्भीर रहेका बताउनुभयो । उहाँले स्वास्थ्य सेवासँगै सामाजिक सुरक्षा, रोजगारी र सम्मानजनक जीवनयापनका अवसर सुनिश्चित गर्न आवश्यक रहेको उल्लेख गर्दै यसका लागि बजेटसमेत विनियोजन गरिएको जानकारी दिनुभयो । कार्यक्रममा धरान क्षेत्रका एचआईभी संक्रमितहरूको वर्तमान अवस्था, उनीहरूको आवश्यकता तथा दीर्घकालीन रणनीतिबारे विस्तृत छलफल गरिएको थियो । सहभागीहरूले संक्रमितहरूलाई आत्मसम्मानका साथ बाँच्न सक्ने वातावरण सिर्जना गर्न स्थानीय सरकार, समुदाय र विभिन्न निकायबीच निरन्तर सहकार्य अपरिहार्य रहेको निष्कर्ष निकाले । नेपालमा एचआईभी÷एड्स नियन्त्रणतर्फ प्रगति भइरहेको देखिए पनि चुनौती पूर्ण रूपमा समाप्त भइसकेको छैन । हाल करिब ३४ हजार ३ सय ३७ जना मानिस एचआईभीसँग जीवनयापन गरिरहेका छन् भने सन् २०२४ मा मात्रै ६ सय १४ नयाँ संक्रमण देखिएका छन् । यो तथ्यांकले दैनिक औसत १ देखि २ जना नयाँ संक्रमित थपिने यथार्थ उजागर गर्छ । यस परिप्रेक्ष्यमा धरानमा सम्पन्न कार्यक्रम केवल छलफलमा सीमित छैन–यो सामाजिक रूपान्तरण तर्फको एक सार्थक पहल हो । यदि यस्ता सहकार्यहरूलाई निरन्तरता दिइयो भने एचआईभी संक्रमितहरूले विभेदरहित, सम्मानजनक र आत्मनिर्भर जीवन बिताउने बाटो अझ सहज बन्ने अपेक्षा गरिएको छ ।