धरान, १७ जेठ
झापाको कचनकवज गाउपालिकाबाट शुक्रबार राति ल्याइएका २७ जना सक्रमणलाई कोभिड उपचार सेवा शुरु गरेको बीपी प्रतिष्ठानले बेड नभएको भन्दै रातभर बाहिर राखेसंगै नेपालको उपचार पद्धतिमाथि नै प्रश्न चिन्ह खडा भएको छ ।
दश बजे ल्याइएका उनीहरुलाई वेड अभाव देखाउदै र प्रतिष्ठानसंग समन्वय नगरेको भन्दै उनीहरु रातभर बाहिर बस्नुपर्ने बाध्यता भएको छ । यसले थप संक्रमणको जोखिम बढाएको छ ।
करिब साढे ९ बजे बीपी प्रतिष्ठान ल्याइएका उनीहरुले बेडकै अभावका कारण रातभर बाहिर बस्नुमात्र परेन राम्रोसंग खान समेत पाएका थिएनन् ।
प्रतिष्ठानमा अहिले पनि कोरोना संक्रमित विरामी ६७ जना रहेका छन् । ७० जनासम्म मात्र लिन सक्ने क्षमता भएकोले समन्वय नगरी यहा ल्याइएका कारण समस्या भएको बीपी कोइराला स्वास्थ्य विज्ञान प्रतिष्ठानका प्रवक्ता डा. निदेश सापकोटाले जानकारी दिनुभयो ।
यो घटना सार्वजनिक भएपछि प्रदेश सरकारका सामाजिक विकास मन्त्री जीवन घिमिरे वीपी प्रतिष्ठान आउनुभएको थियो ।
उहाले कोरोना संक्रमणलाई रातभर बाहिर राख्नु बीपीको लापारबाहीको पराकाष्ठा भएको बताउनुभयो । उहाले यस विषयमा प्रतिष्ठानका उपकुलपति प्रा.डा ज्ञानेन्द्र गिरीसंग पनि छलफल भएको बताउनुभयो । अबका दिनमा यस्ता गल्ति नदोहोरियोस् भन्ने छलफलबाट निष्कर्ष निकालिएको समेत उहाले जानकारी दिनुभयो ।