सार्वजनिक पदमा बसेर अकुत भ्रष्टाचार गरे पनि, सरकारको कठपुतलीको भूमिका निर्वाह गर्दै आएको अख्तियार दुरुपयोग अनुसँन्धान आयोगले भ्रष्टाचार कसुरमा मुद्धा चलाए पनि अब कारबाही नहुने भएको छ । सत्ता र शक्तिको निकट हुनेहरुले अब जेल सजय हैन सम्मानित जीवन विताएर पदमै रहिरहन पाउने भएका छन् । त्यसै पनि नेपाल भ्रष्टाचार हुने मुलुकहरुमध्ये अग्रपंक्तिमा रहेको छ ।
पछिल्लो पटक नेपालको सम्मानित र सबैको आस्थाको केन्द्र रहेको सर्वोच्च अदालतले त्यस्तो निर्णय गरेर सम्पूर्ण नेपालीलाई चकित बनाइदिएको छ । नेपाली काँग्रेसका सांसद टेकबहादुर गुरुङ्गले भ्रष्टाचार कसुरमा पाएको सजाय सर्वोच्च अदालतले फुकुवा गर्दिएको छ । विशेष अदालत काठमाण्डौले गुरुङलाई सांसद पटबाटै निलम्बन गरेको थियो तर सर्वोच्चले मंसिर १६ गते सांसद पद फुकुवा गरेको हो ।
सांसद गुरुङले महिला, बालबालिका तथा समाज कल्याणमन्त्री हुँदा भृकुटी मण्डपको ६० रोपनी जग्गा करोडौ रुपैया कमिशन लिएर न्यून दरमा भाडामा दिएका थिए । अख्तियार दुरुपयोग अनुसन्धान आयोगले १ करोड २१ लाख रुपैया अपचलन गरेको भन्दै दायर मुद्धामा विशेष अदालतले सो रकम बराबरको बिगो र जरिवाना गराउने फैसला गरेको् थियो । तर सर्वोच्च अदालतले विशेष अदालतको निर्णय विपरीत फैसला गरेको छ । सर्वोच्चको त्यस निर्णयप्रति न्यायिक वृत्तमै आलोचना भएको छ । भ्रष्टाचारमा दोषी प्रमाणित भइसकेको मानिसको पद कसरी बहाल हुन्छ ? नेपालको इतिहासमा यस प्रकारको अनपेक्षित फैसला अदालतले कहिल्यै गरेको थिएन । अब यो मुलुक भ्रष्टहरुका लागि स्वर्ग हुने भयो । मुलुकमा प्रजातन्त्र आएको यत्तिका बर्ष सम्म आम सर्वसाधारण नेपालीको जीवनस्तर उकासिनुको सट्टा अद्योगति तर्फ उन्मुख भएको छ । आज मुलु्क युवाविहीन हुँदै गएको छ । उद्योग धन्दा कलकारखाना बन्द प्राय ः भइसकेका छन् । विद्यार्थीहरु कक्षा १२ उत्तीर्ण हुनासाथ पलायन हुन्छन् । गाउँ, सहर वृद्धाश्रम जस्तो बन्दै गएको छ । तर सर्वभौमसत्ता विदेशीलाई बन्धकमा राखेर शासकहरु खरबौ ऋण लिरहेका छन् । एक आद्य पुल र सडक निर्माण भन्दा अरु कुनै काम भएको छैन । विदेशी अनुदान र ऋण राजनैतिक पार्टीहरुबीच भागबण्डा हुन्छ । उनीहरुको जीवनस्तर आकासिएको छ । यतिबेलेमात्र नपुगेर सुन तस्करी, मानव बेचविखन, आफ्नै नागरिकलाई अनागरिक बनाएर आर्जन गर्ने लगायतका धन्दाहरु सत्ता र शक्तिको आडमा सञ्चालन भइरहेको छ । प्रजातन्त्र, गणतन्त्र आएपछि मुलुक यति अद्योगतितर्फ उन्मुख हुन्छ भन्ने कुरा कुनै पनि नेपाली नागरिकले कल्पना सम्म गरेका थिएनन् । चौतर्फी आलोचना, विरोध भएपछि भ्रष्ट, घुस्याहाहरुलाई गिराफ्तारीको नाटक पछिल्लो सरकारले ग¥यो । त्यो नाटक यतिबेला नेपालमा घनिभूत रुपमा मञ्चन भइरहेको छ । कृष्णबहादुर महरा अस्पतालबाटै छुटे, विनोद चौधरीको गिराफ्तारीको हल्ला मत्थर हुँदै गएको छ, आरजु राणाको पनि विस्तारै सेलाउदै गएको छ । अन्य धेरै भ्रष्टहरुको अभिनय पर्दाभित्रै समाप्त हुनेवाला छ । अन्तत ः गृहमन्त्री रवि लामिछाने पनि त्यही भ्रष्ट कुवामै पौडी खेल्छन् । उनको स्टण्डको समाप्ती चाँडै हुँदैछ ।